ЖАНЫМ

Сөзі: Бауыржан Әлқожа
әні: Сәкен Дәрібаев

Қандай жансың сөзі нұрлы,
Өзекті өртеп қылығың,-
Бұлқындырды- ау сезімімді,
Бұлғақтаған бұрымың.  

Монтиған қыз, мөлдір көзді,
Сен  жанымның сыңары...
Ұмыта алмай сол бір кезді,
Көргім келіп тұрады.

Қайырмасы:
Жаным, жаным, жаным,-Кермаралым
Егізісің жүректің.
Жаным, жаным, жаным- таңдағаным,
Көңіліме гүл ектің.

Жаным, жаным, жаным- күлімкөзім
Жымиғаның жан емі.
Баурағандай бойды шырын сөзің,
Әдебің де әдемі!

Күлімдейсің атқан таңдай,
Арбап ғажап көрікпен.     
Құшақтасқан шақтар балдай,
Еліктіріп, еріткен.

Құлын мүсін, мөп-мөлдірім, 
Бір кешейік тағдырды. 
Кірпігіңнен сепкен нұрың,
Сезім отын жандырды.